Մանկական ինտենսիվ թերապիայի հիմնարար կուրսի ուսուցման երկօրյա դասընթաց Երևանում

Հայ օգնության ֆոնդը (ՀՕՖ)` ԱՄՆ-ից ժամանած Ճգնաժամային բժշկության միության մասնագետների հետ համատեղ, Երևանում կազմակերպեց մանկական ինտենսիվ թերապիայի հիմնարար կուրսի ուսուցման երկօրյա դասընթաց:

Մեդ-Պրակտիկի հետ զրույցում ՀՕՖ-ի առողջապահական ծրագրերի պատասխանատու Համբարձում Սիմոնյանը նշեց, որ դասընթացը կազմակերպված է դասախոսությունների և խմբային պրակտիկ աշխատանքների համադրությամբ: Մասնակցել են 17 բժիշկներ՝ Երևանից, Սյունիքի, Լոռու, Շիրակի մարզերից և Լեռնային Ղարաբաղի Հանրապետությունից:

–   Ներկայում մեծ ակտիվությամբ ընթանում են ՀՕՖ-ի շարունակական կրթության ծրագրերը: Այսօրվա հանդիպումը ևս շարունակական կրթության համատեքստում է: Նշեմ նաև, որ շարունակական կրթության ծրագրերին զուգընթաց, մասշտաբային ծրագիր ենք սկսել Տավուշի շրջանի Բերդ համայնքում, որը հիմնականում ուղղված է երեխաների շրջանում սնուցման բարելավմանը: 

–   Ինչպե՞ ս որոշվեց կազմակերպել նման դասընթաց հայ բժիշկների համար:

–   2013 թվականին առաջին անգամ մեր հայրենակից Էդուարդ Սեֆերյանի շնորհիվ առիթ ունեցանք տեղեկանալու հրաշալի մի խմբի մասին, որում ներառված են Միացյալ Նահանգների տարբեր կլինիկաներում աշխատող մանկական ինտենսիվ թերապիայի մի շարք մասնագետներ: Նրանք ստեղծել են միություն, և իրենց ծրագրերում ընդգրկել ժամանակ առ ժամանակ շրջագայելն ու տարբեր երկրներում երկօրյա բարձրակարգ, սերտիֆիկացված դասընթաց իրականացնելը: 2013-ին հրավիրեցինք խմբին՝ հեռահար նպատակ ունենալով մեր առաջատար մասնագետներին վերապատրաստել որպես դասընթացավարներ: Կարծում եմ՝ այսօր հասել ենք այդ նպատակին:

–   Այսօր նաև հայ դասընթացավարնե՞րն են մասնակցում: 

–   Այո՛: Կուրսը պահանջոււմ է սահմանափակում. մասնակիցների թիվը պետք է լինի ոչ ավելի, քան 22-24: Նախորդ կուրսի մեր վեց մասնակիցներն այս անգամ ընտրվեցին որպես դասընթացավարներ: Կարելի է ասել՝ արտերկրյա կոլեգաների ղեկավարությամբ այսօր նրանք են վարում կուրսը:

Մենք փորձում ենք մնայուն գիտելիք ստեղծել, վաղվա օրն ունենալու տեղացի բժիշկների այն խումբը, որը դասընթացներ կվարի Հայաստանում և արտերկրում:

–   Հայ մասնագետները հետաքրքրվա՞ ծ ենք դասընթացով:

–   Բոլորիս հայտնի է, թե ինչ զբաղվածություն ունի վերակենդանացման բաժնի մասնագետը, բայց այսօր շատերը ժամանակ են գտել և մասնակցել դասընթացին:

ԱՄՆ-ից ժամանած դասընթացավար Էդուարդ Սեֆերյանը (Cedars-Sinai Hospital) Մեդ-Պրակտիկի հետ զրույցում նշեց, որ Հայաստանում տեսնում է մեծ պատրաստակամություն, լավ փորձ ու հնարավորություններ:

–   Երկրորդ անգամ ենք Երևանում: Երկու տարի առաջ այստեղ էինք՝ իրականացնելու դասընթացավարների վերապատրաստում: Այն ժամանակ վերապատրատված մասնագետներն այսօր միացել են մեզ, և միասին ենք վարում դասընթացը: Վերապատրաստման հիմնական ուղղվածությունը ծանր վնասվածքներով երեխաներին ճիշտ բուժօգնություն ցուցաբերելն է:

Շատ կարևորում եմ, որ այս գիտելիքները տարածվեն նաև մարզերում:  Ի սկզբանե նպատակադրված էր այս ամենը մնայուն դարձնելու ՝ ստեղծելոու դասընթացավարների խումբ, որն ինքնուրույն կարող է վերապատրաստումներ իրականացնել:

2013-ին վերապատրաստված մասնագետներից է «Սուրբ Աստվածամայր» բժշկական կենտրոնի վերակենդանացման բաժանմունքի վարիչ Աննա Չոբանյանը, ով այս անգամ ամերիկացի մասնագետների խմբի հետ մասնակցում էր որպես դասընթացավար:

–   ՀՕՖ-ի կողմից իրականացվող այս կրթական շարունակական ծրագիրը շատ կարևոր է և ողջունելի: Ինտենսիվ թերապիայի և անեսթեզիալոգիայի կուրս է, սկսվել է երկու տարի առաջ, երբ մենք՝ մի քանի բժիշկներ, առաջինը մասնակցեցինք:

Նպատակն այն էր, որ մենք՝ որպես վերապատրաստված մասնագետներ, դասավանդեինք մյուս բժիշկներին:

Զգալի առաջընթաց եմ տեսնում այսօր. և՛ Երևանում, և՛ Հայաստանի տարբեր մարզերում մոտեցումները նույնացվում են, դառնում համադրելի, մշակվում են արձանագրություններ:

Դասընթացին մասնակցող բժիշկները մեզ հետ զրույցում ևս մեծապես կարևորեցին նմանատիպ հանդիպումները՝ որպես  նոր գիտելիքների ձեռքբերման, փորձի փոխանակման լավ հնարավորություն:

Հրանուշ Ահարոնյան, «Սուրբ Աստվածամայր» բժշկական կենտրոնի ռեանիմատոլոգ

–   Շատ ուսուցողական ծրագիր է անգամ այն մասնագետների համար, ովքեր ունեն մեծ փորձ: Կարիք ունենք տարեցտարի ավելի թարմացնելու գիտելիքները. նման հանդիպումները նպաստում են դրան: Շատ հետաքրքիր անցավ հատկապես շնչական համակարգին վերաբերող քննարկումը, որի ընթացքում նոր մոտեցումներ բացահայտեցի, որոնք, միանշանակ, կիրառելի են նաև մեզ մոտ, միայն թե անհրաժեշտ են պարբերական վերապատրաստումներ, փորձի փոխանակում:

Հարցեր, պատասխաններ, մեկնաբանություններ