Կայացավ Լյարդաբանության երկրորդ միջազգային գիտաժողովը Երևանում

«Լյարդաբանությունը բժշկության ամենակարևոր և ամենաարագ զարգացող ճյուղն է»,- այս խոսքերով սկսեց լրագրողների հետ զրույցը լյարդաբանական ֆորումի նախագահ Հասմիկ Ղազինյանը:

Հիշեցնենք, որ այս օրերին Երևանում ընթանում էր  լյարդաբանության երկրորդ միջազգային գիտաժողովը: Գիտաժողովի շրջանակներում աշխարհի տարբեր երկրներից և Հայաստանից շուրջ 400 լյարդաբաններ անդրադարձան լյարդաբանության հետ կապված բոլոր խնդիրներին: Առանձնակի շեշտադրում ստացան վիրուսային հեպատիտները, դրանց կանխարգելման և բուժման ժամանակակից մեթոդները:

Գիտաժողովը վարում էր  աշխարհահռչակ լյարդաբան, Սան Դիեգոյի համալսարանական կլինիկայի հեպատոլոգիայի ծառայության ղեկավար Ռոբերտ Գիշը, ով 20 տարուց ավել է, ինչ զբաղվում է լյարդաբանական խնդիրներով:

Մեզ հետ զրույցում Ռոբերտ Գիշն իր ուրախությունն արտահայտեց առ այն, որ կրկին հնարավորություն  է ստացել այցելել Հայաստան և այստեղ քննարկել լյարդաբանության կարևորագույն խնդիրները, մասնավորապես` հեպատիտները:

–   Այսօրվա խնդիրները հիմնականում առնչվում են հեպատիտ B-ին և C-ին: Մենք կքննարկենք այս խնդիրների արդիականությունը, մասնավորապես. ինչպես կանխարգելել դրանց տարածումը և ինչպես խուսափել հետագա բարդություններից:

–   Ինչպիսի՞ն է իրավիճակն ԱՄՆ-ում` կապված հեպատիտների հետ:

–   Քանի որ հեպատիտ C-ն տարածվում է  բժշկական միջամտության ուղիներով կամ սեռական ճանապարհով, վերջին 4 ամսվա ընթացքում ԱՄՆ-ում կազմակերպվում են մեծամասշտաբ քարոզարշավներ, որպեսզի մարդիկ տեղեկացված լինեն հիվանդության մասին, իմանան, թե ինչպես կարելի է խուսափել վարակից: Իսկ հեպատիտ B-ի դեմ, որը  տարածվում է հիմնականում արյան փոխներարկման ճանապարհով կամ մայր-երեխա կապով, մեր աշխատանքները հիմնականում ուղղված են երեխաների շրջանում պատվաստումների իրականացման հնարավորինս մեծամասշտաբ ընդգրկմանը: Ներկայումս ԱՄՆ կառավարությունը որոշում է կայացրել այն մասին, որ 1995-ից մինչև այսօր  ծնված բոլոր անձիք անվճար անցնեն հեպատիտ C-ի ախտորոշմանը վերաբերող  թեստը:

–   Տիրապետո՞ւմ եք որևէ վիճակագրական տեղեկատվության ԱՄՆ-ում հեպատիտ B-ով կամ C-ով վարակվածության վերաբերյալ:

–   ԱՄՆ-ի բնակչությունն ունի հեպատիտ C-ի 5 միլիոն և B-ի 2 միլիոն վարակակիրներ:

–   Ինչպիսի՞ն է իրավիճակը Հայաստանում ` Ձեր գնահատմամբ:

–   Հայաստանի բնակչության 2%-ը հիվանդ է հեպատիտ B-ով, իսկ 6%-ը` C-ով: Պետք է կազմակերպել այնպիսի աշխատանքներ, որպեսզի առաջին հերթին կանխվի բժշկական միջամտությամբ վարակի փոխանցման հավանականությունը: Դրա համար պետք է ժամանակին վնասազերծել բժշկական  պարագաները:

–   Ինչպե՞ս եք գնահատում հայ լյարդաբանների աշխատանքը:

–   Ուզում եմ նշել պրոֆեսոր Ղազինյանի անսպառ աշխատանքը Հայաստանի և Արցախի բնակչության համար:  Մեր առաջիկա նպատակներից  է` ընդգրկել Առողջապահության նախարարությանը, որպեսզի հետազոտություններ անցկացվեն այս հիվանդությունների շրջանակներում և նորից շեշտադրվի կանխարգելումը, մասնավորապես` պատվաստումները:

Լյարդաբանության միջազգային գիտաժողովի, լյարդաբանության ոլորտում արդի խնդիրների  մասին զրուցեցինք «Նորք» ինֆեկցիոն հիվանդանոցի լյարդաբանական բաժանմունքի ղեկավար Հասմիկ Ղազինյանի հետ:

–   Ի՞նչ նպատակ է հետապնդում ֆորումը և ի՞նչ նորություններ ասվեցին այսօր:

–   Աշխարհում այսօր կազմակերպվում են տարեկան 10-20 նմանատիպ կոնֆերանսներ: Նպատակը լյարդաբանության զարգացումն է, որովհետև լյարդաբանությունը բժշկության ամենակարևոր դաշտերից է, քանի որ իր մեջ ընդգրկում է այնպիսի հիվանդություններ, ինչպիսիք են վարակիչ հեպատիտները, որոնց արդյունքում գրանցված մահացություններն այսօր տարեկան 1 միլիոնից ավել են: Արտասահմանում` մասնակցելով նմանատիպ կոնֆերանսների, նպատակ դրեցինք նման հնարավորություն տալ նաև հայ բժիշկներին և կազմակերպվեց այս գիտաժողովը, որին մասնակցեցին 11 բանախոս արտասահմանից և 10 -ը` Հայաստանից: Սա փորձի փոխանակում է, միջազգային համագործակցություն:

–   Համեմատած այլ երկրներին ի՞նչ իրավիճակ է Հայաստանում` կապված հեպատիտների հետ:

–   Կա ստույգ տեղեկատվություն, որ հեպատիտ C-ի և B-ի առումով Հայաստանը պատկանում է միջին տարածվածության գոտուն:

–   Կարո՞ղ եք ստույգ վիճակագրություն ներկայացնել:

–   Հայաստանի ազգաբնակչության 2-3 %-ն ունի քրոնիկ հեպատիտ B վիրուսակրություն և մոտավորապես 4%-ը` հեպատիտ C վիրուսակրություն:

–   Ամբողջովի՞ն բուժվող հիվանդություն է հեպատիտ C-ն:

–   Ներկայումս գոյություն ունեն  միջազգային լուրջ ուղեցույցներ, որոնցով առաջնորդվում ենք։ Տարեցտարի ավելացնում է հեպատիտ C-ից բուժվածների թիվը: Դեռևս այն չի համարվում 100%  բուժվող հիվանդություն, բայց եթե 10 տարի առաջ բուժման արդյունավետությունը գնահատվում էր 30%, այժմ այն դարձել է 70-80%:

Հարցեր, պատասխաններ, մեկնաբանություններ