Ընտանեկան բռնության դեպքերի մասին կիմանա հանրությունը

Նոյեմբերի  24-ին  «Նովոստի» մամուլի կենտրոնում կայացավ «Ընդդեմ կանանց նկատմամբ բռնության» կոալիցիայի մամուլի ասուլիսը` նվիրված նոյեմբերի 25-ին մեկնարկող Կանանց նկատմամբ բռնության դեմ պայքարի 16-օրյակին: Ի դեպ, նոյեմբերի 25-ը պաշտոնապես ճանաչվել է որպես Կանանց նկատմամբ բռնության դեմ պայքարի միջազգային օր: Աշխարհի 164 երկրների ավելի քան 3700 կազմակերպություններ մասնակցում են ամենամյա տեղեկատվական միջոցառումներին և նախաձեռնություններին:

«Հասարակություն առանց բռնության» ՀԿ-ի ծրագրերի ղեկավար Աննա Նիկողոսյանը լրագրողներին ասել է. «Այսօր Հայաստանի Հանրապետությունում ծառացել է խնդիր. դա`ընտանեկան բռնությունների դեպքերի շարունակականությունն է, և մենք բոլորս պետք է ջանքեր գործադրենք այդ երևույթը վերացնելու ուղղությամբ: Հիշենք, որ 2010թ. հոկտեմբերին Մասիս քաղաքում մահացավ Զարուհի Պետրոսյանը` ամուսնու և սկեսրոջ ծեծի հետևանքով: Այդ զարհուրելի դեպքը օպերատիվ կերպով համախմբեց 7 հասարակական կազմակերպությունների, որոնք շատ արագ ստեղծեցին «Ընդդեմ կանանց նկատմամբ բռնության» կոալիցիան: Ըստ Ա. Նիկողոսյանի, այսօր կոալիցիան ունի առաքելություն. դա` առաջին հերթին, ընտանեկան բռնության դեպքերն իրազեկելն է, ինչպես նաև կանխարգելիչ միջոցառումներ ձեռնարկելը:

Բանախոսը նաև նշել է, որ «Ընդդեմ կանանց նկատմամբ բռնության» կոալցիան ունի մի շարք նպատակներ և նպատակներից մեկը` ընտանեկան բռնության դեպքերի լուսաբանումն է, հետևանքների մասին հանրությանն իրազեկումն ու մեր հասարակության ընտանեկան բռնության` որպես երևույթի, մտածողության և ընկալման փոփոխությունը. «Մեկ տարվա երկար պայքարից հետո ընտանեկան բռնությունների ասպարեզում կոալիցիան արձանագրել է բազմաթիվ հաղթանակներ, ինչպես նաև իրականցրել է մի շարք միջոցառումներ, ակցիաներ, թրեյնինգներ»,- հայտնել է Ա. Նիկողոսյանը:

«Կանանց իրավունքների կենտրոն» ՀԿ հիմնադիր, տնօրեն Սուսաննա Վարդանյանն ու «Կանանց ռեսուրսների կենտրոն » ՀԿ աշխատակից Սիրանույշ Դավթյանն էլ անդրադարձել են սպասվող միջոցառումներին: Բանախոսները հիմնականում նշել են, որ հասարակության ուշադրությունը կգրավեն Հյուսիսային պողոտայում «Ամոթի պատ» հանրային միջոցառումը, «Խոստումների ծառ»-ը, որոնց ընթացքում մարդիկ թղթին կհանձնեն իրեն վերաբերմունքը բռնության հանդեպ և տարբերակներ կառաջարկեն` ինչպես պայքարել բռնության դեմ:

Լուսանկարը` pmi.com

Հարցեր, պատասխաններ, մեկնաբանություններ