Քրմոյան. Առողջապահության ոլորտում լուրջ բարեփոխումներ են իրականացվում, լուրջ արդյունքներ կան

Առողջապահության նախարարության աշխատակազմի ղեկավար Սուրեն Քրմոյանն այսօր լրագրողների հետ հանդիպմանը հայտարարեց, որ առողջապահության ոլորտում իրականացվող բարեփոխումների առաջին փուլը կարելի է ավարտված համարել, նշեց, որ այժմ մեկնարկելու են համակարգային փոփոխություններ: Առաջին փուլում ի հայտ եկած 3 խումբ խնդիրների` կազմակերպչական, ֆինանսական, վարքագծային, նախարարի կողմից տրվել են առարկայական հանձնարարականներ, առաջիկա երկու ամիսների ընթացքում ակնկալվում է, որ դրանց արդյունքները կսկսեն տեսանելի լինել:

Բարեփոխումների նպատակը, ըստ պաշտոնյայի, բժշկական ծառայությունների որակի բարելավումն ու դրանց վերաբերյալ բնակչության գոհունակության բարձրացումն է: Բարեփոխումների շրջանակում նախատեսվում է լուծել նաև հարակից մի շարք խնդիրներ, ինչպիսիք են ասենք, ավտոկայանման, վերելակավարի ու այլ վճարների հարցը, ինչպես նաև բուժծառայությունների վճարումը միայն դրամարկղում կատարելը և այլն: Քրմոյանի խոսքով, բարեփոխումների վերաբերյալ իրենք բազմաթիվ առաջարկներ ստացել են լրատվամիջոցներից, բարեփոխումների իրականացման հետ համաձայնել է բուժաշխատողների մեծ մասն ու պատրաստակամություն հայտնել աջակցել:

Ի դեպ, բարեփոխումների շրջանակում նախատեսվում է, որ բուժհիմնարկում գործադիր տնօրենից զատ լինի կառավարման խորհուրդ: Այդ մարմնի ձևավորման վերաբերյալ հարցերը դեռևս հստակեցման փուլում են, մի բան պարզ է, անդամները աշխատելու են հասարակական հիմունքներով: «Էական ֆինանսական միջոցներ այդ խորհուրդների համար չեն պահանջվի: Փորձելու ենք հնարավորինս ներկայացուցչական անել այդ խորհուրդները»,-ասաց նա, հնարավոր համարելով, որ խորհրդում կարող են ընդգրկվել նաև ՀԿ-ների, աուդիտորական կազմակերպությունների, նախարարության, հարկային մարմինների ու այլ կառույցների աշխատակիցներ:

«Մենք լուրջ բարեփոխումներ ենք անում, և լուրջ արդյունքներ ունենք: Այս բարեփոխումներին տարիներ շարունակ մարդիկ չեն մոտեցել, մտածել են` ո՞նց պետք է անեն»,-ասաց Քրմոյանը, ընդունելով, որ համակարգը իդեալական վիճակում չէ, բայց դրան ուղղված աշխատանքներ իրականացվում են:

Աշխատում են դիտորդական խմբեր, ֆիքսվում ու վերլուծվում են թեժ գծով ստացած զանգերն ու խնդիրները: Նախարարությունն այս տարի կարևորել ու մեծ ուշադրություն է դարձնելու հիվանդ-բժիշկ հարաբերություններին: Քրմոյանը լրատվամիջոցներին խնդրեց, որ դրական փորձերն էլ հրապարակեն, որպեսզի «հիվանդը հավատա բժշկին: Եթե մենք բարելավենք այդ հարաբերությունները, ապա բացասական դեպքերը ավելի քիչ կլինեն: Շատ վտանգավոր երևույթ է, որ մենք բժկին փնովում ենք»:

Հարցեր, պատասխաններ, մեկնաբանություններ